Créditos: ESA / NASA / JPL-Caltech / STScIExplicación: as nubes de po cósmico esténdense por todo este retrato cósmico da galaxia satélite da nosa Vía Láctea, a Gran Nube de Magallanes. De feito, esta excelente imaxe composta do Observatorio Espacial Herschel e do Telescopio Espacial Spitzer amosa que as nubes de po enchen esta galaxia anana veciña, de xeito similar ao po ao longo do plano da propia Vía Láctea. As temperaturas do po soen trazar a actividade de formación estelar. Os datos do Spitzer en tons azuis sinalan a presenza de po quente arrequecido polas estrelas novas. Os instrumentos do Herschel contribuíron aos datos da imaxe amosados en vermello e verde, desvelando a emisión de po das rexións intermedias e máis frías onde a formación estelar está a comezar ou xa se detivo. A aparencia infravermella da Gran Nube de Magallanes, dominada pola emisión do po, é diferente das visións en imaxes ópticas. Pero este fotograma salienta a recoñecida Nebulosa da Tarántula da galaxia, visible facilmente aquí coma a rexión máis brillante á esquerda do centro. A tan só 160.000 anos luz de distancia, a Gran Nube de Magallanes ten uns 30.000 anos luz de diámetro.