IC 5070: un pelícano poeirento no Cisne

ic5070_pelican_nebula_steve_richards1024Créditos da imaxe e copyright: Steve Richards (Chanctonbury Observatory)
Explicación: o recoñecible perfil da nebulosa Pelícano planea a case 2.000 anos luz de distancia na constelación de altos voos Cygnus, o Cisne. A nube interestelar de gas e po,  tamén coñecida coma IC 5070, atópase axeitadamente fóra da “costa leste” da nebulosa Norteamérica (NGC 7000), outra nebulosa de emisión de aspecto abraiantemente familiar en Cygnus. Ámbalas dúas nebulosas, Pelícano e Norteamérica, forman parte da mesma rexión de formación estelar grande e complexa, case tan achegada como a máis coñecida nebulosa de Orión. Desde o noso lugar de observación, as nubes escuras de po (arriba á esquerda) axudan a definir o ollo do Pelícano e o longo peteiro, mentres unha fronte brillante de gas ionizado suxire a forma curvada da cabeza e o pescozo. Esta imaxe espectacular en cores combinadas emprega datos en banda estreita rexistrados da emisión dos átomos de hidróxeno e osíxeno na nube cósmica. A escena abarca uns 30 anos luz á distancia estimada da nebulosa Pelícano.