A Guerra das Galaxias: M81 contra M82

M81vM82_AvdHoevenEtAl_960Créditos da imaxe e copyright: André van der Hoeven, Neil Fleming e Michael Van Doorn
Explicación: na esquina inferior esquerda, arrodeado polos brazos espirais azuis, está a galaxia espiral M81. Na esquina superior dereita, marcada por gas vermello e nubes de po, está a galaxia irregular M82. Esta vista espectacular amosa estas dúas galaxias descomunais trabadas en combate gravitatorio, tal e como estiveron durante o último milleiro de millóns de anos. A gravidade de cada galaxia afecta radicalmente á outra durante cada paso, cada cen millóns de anos. Na última rolda, a gravidade de M82 probablemente fixo emerxer ondas de densidade propagándose ao redor de M81, resultando na riqueza dos brazos espirais de M81. Pero M81 deixou a M82 con violentas rexións de formación estelar e nubes de gas en colisión tan potentes que a galaxia brilla en raios X. Esta gran batalla óllase desde a Terra ao través do brillo tenue dunha nebulosa de fluxo integrado, un complexo de nubes de po e gas difuso pouco estudiado da nosa galaxia Vía Láctea. Nuns poucos milleiros de millóns de anos só ficará unha galaxia.