Créditos da ilustración: NASA Ames / SETI Institute / JPL-Caltech, Descubrimento: Elisa V. Quintana, et al. Explicación: o planeta Kepler-186f é o primeiro planeta do tamaño da Terra que se atopa no interior da zona habitable dunha estrela máis alá no Sol. O afastado mundo, descuberto empregando datos procedente da prolífica sonda espacial Kepler, a cazadora de planetas, orbita á súa estrela, unha tenue e fría anana M con aproximadamente a metade do tamaño e masa do Sol, a uns 500 anos luz de distancia na constelación Cygnus. As ananas M son comúns, aportando máis ou menos o 70 por cento das estrelas da nosa galaxia Vía Láctea. Ubicado no interior da zona habitable, onde as temperaturas superficiais permiten que sexa posible a auga líquida, Kepler-186f orbita preto, a menos de 53 millóns de quilómetros (o que vén sendo a distancia Mercurio-Sol) da estrela anana M, unha vez cada 130 días. Coñécense outros catro planetas do afastado sistema. Os catro son só un pouco máis grandes cá Terra e en órbitas moi achegadas, que tamén se ilustran na abraiante imaxe artística. Mentres que o tamaño e órbita de Kepler-186f son coñecidos, a súa masa e composición non o son, e non se poden determinar pola técnica de tránsito do Kepler. Aínda así, os modelos suxiren que podería ser rochoso e ter unha atmosfera, convertíndoo potencialmente no exoplaneta máis semellante á Terra descuberto ata o de agora…