O quinteto de Stephan

Datos da imaxe: Hubble Legacy Archive, ESA, NASA; procesamento: Al Kelly

Explicación: nesta atractiva imaxe formada a partir de datos do extenso Hubble Legacy Archive aparece o primeiro grupo compacto de galaxias que foi identificado, o Quinteto de Stephan. A preto de 300 millóns de anos luz de distancia, só catro destas cinco galaxias están realmente atrapadas nunha danza cósmica de repetidos encontros cercanos. A infiltrada é, en todo caso, doada de detectar. As galaxias que interactúan, NGC 7319, 7318A, 7318B, e 7317 teñen un ton xeral amarelento. Tenden a ter rizos e colas deformes, desenvolvidas baixo a influencia das perturbadoras mareas gravitatorias. A galaxia predominantemente azul, a NGC 7320, atópase máis preto, xusto a 40 millóns de anos luz de distancia, e non forma parte do grupo. O Quinteto de Stephan queda na periferia da alta constelación de Pegasus. Tendo en conta a distancia estimada do cuarteto de galaxias que interactúan entre elas, o campo de visión abrangue preto de 500.000 anos luz. Con todo, movéndose un pouco alén do campo de visión, enriba á esquerda, os astrónomos poden identificar outra galaxia, a NGC 7320C, que se atopa a 300 millóns de anos luz de distancia. Por suposto, engadila podería devolverlle ao cuarteto o seu estatus de quinteto.

Texto orixinal no APOD.

Unha reflexión sobre “O quinteto de Stephan

  1. Hola. Preciosa danza… Ahora la página está estupenda, antes también lo estaba pero ahora está más próxima…más cercana. Gracias por la mejora y que tengais un buen finde. Besos.

Os comentarios están pechados.