A Nebulosa Roseta


Créditos da imaxe e copyright: Brian Davis
Explicación: a Nebulosa Roseta non é a única nube cósmica de gas e po que evoca a imaxe das flores; pero é a máis famosa. No límite dunha gran nube molecular en Monoceros, a uns 5.000 anos luz de distancia, os pétalos desta rosa son realmente unha gardería estelar cunha adorable forma simétrica, esculpida polos ventos e radiación procedente do seu cúmulo central de estrelas novas e quentes. As estrelas do enerxético cúmulo, catalogado como NGC 2244, teñen só uns poucos millóns de anos de idade, mentres que a cavidade central da Nebulosa Roseta, catalogada como NGC 2237, ten uns 50 anos luz de diámetro. A nebulosa pode verse directamente cun pequeno telescopio cara a constelación do Unicornio (Monoceros).

Texto orixinal no APOD.

Unha reflexión sobre “A Nebulosa Roseta

  1. Sendo o día que é, esta cousa comercial dos namorados (se a xente coñecera a vida do suposto San Valentín cambiaría moito o conto), no APOD da NASA tocaba Rosetta. Como non!

    Deben levar unha decea ou unha ducia desde que se publica a foto diaria. Iso si, ben feitiñas.

    En comparación, podedes comparar co traballo dos afeccionados galegos. No foro irmá desta páxina aparece unha imaxe de hai uns días desta mesma nebulosa.

    Gústache ou non?: Thumb up 0 Thumb down 0

Os comentarios están pechados.